ڈائریکٹر جنرل ہیلتھ گلگت بلتستان ڈاکٹر سلیم الدین نے ڈائریکٹر انسپکشن اینڈ آپریشنز ہسپتالز سرجن ڈاکٹر اقبال عزیز اور ڈائریکٹر ہیلتھ گلگت ریژن ڈاکٹر عبدالسلام کے ہمراہ شہید سیف الرحمان گورنمنٹ ٹیچنگ ہسپتال گلگت کا تفصیلی دورہ کیا۔
اس موقع پر میڈیکل سپرنٹینڈنٹ شہید سیف الرحمان گورنمنٹ ٹیچنگ ہسپتال ڈاکٹر فرمان اللّٰہ بھی ہمراہ موجود تھے، جنہوں نے معزز افسران کو ہسپتال میں جاری ترقیاتی منصوبوں اور مریضوں کو فراہم کی جانے والی سہولیات سے متعلق تفصیلی بریفنگ دی۔
دورے کے دوران معزز افسران نے ہسپتال میں ایم آر آئی مشین کے سول ورک کے جاری کام اور لیبارٹری ڈیپارٹمنٹ کا باریک بینی سے معائنہ کیا۔ اس موقع پر ڈائریکٹر جنرل ہیلتھ نے وزیر اعلیٰ پنجاب محترمہ مریم نواز کے متوقع دورے سے قبل ایم آر آئی مشین انسٹال کر کے مکمل طور پر فعال بنانے کے لیے متعلقہ حکام کو کام کی رفتار تیز کرنے کی ہدایت جاری کی۔
ڈاکٹر سلیم الدین نے ہسپتال میں صحت کی سہولیات کو مزید بہتر بنانے کے عزم کا اظہار کرتے ہوئے کہا کہ شہید سیف الرحمان گورنمنٹ ٹیچنگ ہسپتال گلگت کو درکار تمام سہولیات کی فراہمی کے لیے محکمہ صحت ہر ممکن تعاون جاری رکھے گا تاکہ عوام کو جدید اور معیاری طبی سہولیات میسر آ سکیں۔

ترجمان۔ شہید سیف الرحمان گورنمنٹ ٹیچنگ ہسپتال گلگت